Thursday, March 01, 2012

إنســـــــــــــان الغاب .. طويــــــــــــــــــل الناب

ركزوا معايا حبتين عشان غالبا شكلنا هنتخانق




مشهد واحد:



الجو كان رايق.. رومانسي.. مثالي .. هو و هي و زقزقة العصافير و هباب الوابور و الكبشة (اللي هتلعب دور كبير في المشهد الرومانتيكي الملتهب) .. يا دوب دخل برجله الفخ و هووب.. لفت هي المفتاح لفتين و رمته في خزنة الأسرار جنب قلبها على طول ، و بدأت المطاردة الإستعراضية الغنائية : بتبصلي كده ليه و المكر جوه عينيك (رمي بلا) ، كل العيون حواليك قاتلها سحر عينيك (جبر خواطر) ، حبيبي الاسمر .. باحبه الاسمر .. اسمر ..احمر ..اخضر (خيال علمي أو أثر حبوب أبو صليبة أو صراصير ) .. كل ده بيحصل بينما الغلبان المستهدف بيبكي و يترجاها ، أبوس إيدك يا حميدة ،إخزي الشيطان يا حميدة ، بينما أمها اللي واضح إنها جزء من المخطط الماسوني واقفة ورا الباب بتصوت كده و كده ، و لما سألها القبطان جنزوري اللي قال مصر لن تركع أبدا... والا باينه كان القبطان حنفي اللي كلمته ما بتنزلش الأرض أبدا..المهم حد منهم يعني سألها إيه الموضوع .. فقالتله ببراءة مطعمه بالمسكنة : خير ، بس هم يفتحوا و كل شيء يتدبر ، الكلمة كانت كفاية لأن الكل يقتحم المطبخ في اللحظة اللي كان فيها إسماعيل ياسين بيحاول يصطاد بالكبشة المفتاح اللي خبته زينات صدقي في أعمق الأعماق الدافئة (أول مشاهد السينما المصرية بخاصية ال 3 دي) ، و هكذا قرر الجميع أن تتزوج "عذراء الربيع" من "إنسان الغاب طويل الناب" حماية لشرف البنت اللي زي كارت الشحن ما بيتشحنش غير مرة واحدة ، بينما بقية المشاهدين انصرفوا عن متابعة القضية أو التفكير فيها من أساسه بمجرد دخول فستان هند رستم الجيلاتيني المتضامن مع كل "أشياءها" و شعر صدر أحمد رمزي الكاريزماتي المدمر للمكان ، أما أنا فمافهمتش .. إيه وجه الفضيحة في واحد و واحدة إتقفل عليهم باب مطبخ واحد لمدة 3 دقايق .. فهمتوا انتوا ؟






مشهد اتنين:




تماشيا مع المزاج العام للبلد اليومين دول و اللي بيردد حتى و هو نايم "إسلامية إسلامية" خلينا ناخد آلة الزمن و نرجع 1400 سنة و شوية للماضي ، لنتابع سيدة صغيرة السن صغيرة الحجم ، طالعة مع قافلة من القوافل في غزوة من الغزوات ، تتمشى السيدة شوية أول ما تتوقف القافلة للراحة و بعدين ترجع أول ما يبتدوا يشدوا الرحال ، لكن تفاجأ بإن عقدها اللي بتحبه وقع منها فترجع عشان تدور عليه تكون القافلة سابتها و مشيت من غير ما حد ياخد باله إن الهودج بتاعها فاضي ، ترجع ماتلاقيش حد فتقعد مكانها تستنى يمكن يحسوا إنها مش موجودة و يرجعوا يدوروا عليها ، بالمصادفة بيعدي واحد غريب لكنه بيتعرف على الست بالشبه ، و من نظرة واحدة يفهم الموضوع ، من غير ما يتكلم يسيبها تركب على جمله و يمشي قدامها لحد ما توصل لأهلها ، بترجع بيتها و بتعيش حياتها لكن بتحس إن الكل متغير من ناحيتها ،إيه السبب ما تعرفش ، حتى زوجها اللي كان دايما -رغم مكانته الكبيرة- طول عمره حنين معاها و عمره ما كان بيخجل إنه يعلن للجميع أد إيه هو بيحبها ، حست إنه متغير، ليه ، برضه مافهمتش ، فضل الموضوع ده مدة طويلة ، لحد ما اكتشفت إن أهلها شاكين فيها، و اللي يسوى و اللي ما يسواش بيجيب في سيرتها عشان خمنوا إن مادام كانت في الصحرا مع واحد لفترة من الزمن لوحدهم يبقى أكيد أكيد غلطت معاه ، قبل ما تقولوا إنهم طبعا عندهم حق أو و هي إيه اللي وداها هناك ، و نبتدي نسأل أسئلة متعلقة بنوع العباية اللي كانت لابساها بالظبط ، و هل كانت سوست والا مساعدين؟ ، خليني ألحق و أقولك إن دي كانت حادثة الإفك و السيدة كانت السيدة عائشة اللي برأها ربنا من فوق سبع سموات بقرآن يتلى لآخر الزمان ، النقطة اللي دايما بتبهرني في القصة دي إن السيدة عائشة ماشافتش إيه يعني المشكلة اللي حصلت عشان هي و الراجل اللي أنقذها كانوا متواجدين في مكان واحد في الصحرا لفترة من الزمن بعيد عن الناس ؟، ليه الناس إفترضت السيء بينما كان في إمكانهم إنهم يفترضوا الطبيعي و المنطقي إعتمادا علىها هي و عليه مش بس ع الموقف اللي كانوا فيه ؟





مشهد تلاتة :




أي مكان في أي حتة في أي ظرف و أي وقت ، أي بنت تلاقي نفسها في مكان لوحدها مع رجل ما ، شعور الترقب و الحذر ، الخوف و أحيانا الرعب ، جسمها كله اللي بتستنفر كل خلية من خلاياه لما يقترب منها أي رجل لمسافة متر أو أقل ، كام بنت اتعلمت من نعومة أظافرها تنط من رصيف لرصيف لو لقت واقف على الرصيف شاب أو شلة شباب ، كام مرة بنت ركبت ميكروباص و أخدت كرسيين قدام عشان تتقي شر أي حد راكب جنبها و تتقي برضه صابع السواق الصغير اللي من المتوقع إنه يخبط (ببراءة متناهية) في ركبتها كل مرة السواق بينقل فيها الفتيس (ثبت بالدليل العلمي إن الصابع الصغير لأي سواق مصري أطول بمعدل 9 سم من الصابع الصغير لأي سواق من أي جنسية تانية.. موسوعة جنس للأرقام القياسية) ، هتقولوا عادي ، ده المتوقع من اي بنت متربية و مؤدبة ، هاقولك و ليه أصلا بيزرعوا الشعور ده جوانا من نعومة أظافرنا لحد مانموت ؟ ، ، الإحساس بالهشاشة و القابلية للكسر ، و إن ألف إيد و إيد عايزة تتمد عشان تجرحك و تكسرك و تكرمشك و ترميكي في أي مكان ، مش باتكلم عن الحياء و الحشمة اللي بالتأكيد مطلوبين ، لكن باتكلم عن الشعور الدائم بإنك ضحية و كل اللي حواليكي ( لو اتيحت لهم الفرصة ) هيبقوا جناة ، هذا الفزع اللي ممكن يشل بنت و يمنعها من إنها تستغل قدراتها و الفرص اللي قدامها لأقصى حد ،كام واحدة تعرفوها اتحرمت تدرس في الكلية اللي حباها عشان التحاقها بيها هيستلزم سفر يومي أو إقامة في محافظة تانية ؟ ، كام واحدة قررت إنها ماتكملش كورس لتعليم أي حاجة لما لقت نفسها هي الوحيدة البنت اللي في المجموعة و الباقي كلهم رجال ؟ ، كام واحدة تخلت عن حلم إنها تشتغل في مجال من المجالات عشان قالولها هيبقى اختلاطك كله بالرجال ؟




أزيدكم من الشعر بيت ؟ ، مش جايز الشعور اللي بنزرعه جوه كل بنت إنها ضحية في انتظار حفرة تقع فيها برضه بيخلق جوه كل ولد إنه جاني في انتظار فرصة ، كون إنه يبقى سافل بأه هو ده الشيء الطبيعي ، بما إنه لما بيتحط مع بنت لوحدهم في مكان ما و ما يبستغلش الفرصة عشان يتصرف تصرف دنيء بيقابل بتصفيق و تهليل و ترحاب و كأن ده الشيء النادر بينما المتوقع منه إنه يكون حيوان ، الطبيعي إنك لما تركب جنب واحدة في أتوبيس إنك تتحرك لغاية لما تلزق فيها ، الطبيعي لو انت و هي واقفين في طبور إن إيدك تتمد (غصب عنك) و بعدين تبقى تعتذر لها ، الطبيعي إنك لما تبقى إنت و هي لوحدكم في الصحرا إنك تغتصبها مثلا ؟ !! .. هي دي تقريبا الرسايل اللي بيوصلهالنا المجتمع .




على الفيسبوك (ضمير شباب الشعب المصري) بيتناقلوا القصة دي في جروبات كتير .. كان فيه مرة بنت طالعة في رحلة مع جروب كبير ، لسبب ما الجروب نسيها و رجع و المكان اللي كانت فيه كان عبارة عن غابة نادرا لما تلاقي حد ساكن فيها ، لكنها لقت بيت لشاب "عابد" ، إختار المكان ده عشان يتعبد فيه بعيد عن الدوشة و الناس ، طلبت منه يساعدها فدعاها تبات لحد الصبح ، لكنها قضت الليلة كلها مرعوبة و هي شايفاه بيحرق صوابعه على لهب شمعة واحد بعد التاني ، بعد ما رجعت البنت لأبوها و حكتله حب يعرف ليه الشاب "العابد" ده كان بيعمل كده ، فراح و سأله ، جاوبه إن "الشيطان" كان طول الليل بيوسوسله بإنه يرتكب السوء مع بنته و كل ما كان بيوسوسله كان بيحرق صابع من صوابعه عشان الألم يشغله عن السماع للشيطان ، فقال إيه أبو البنت اتكيف قوي من الكلمتين دول و قرر يجوزه بنته ، و يا سلام ع التعليقات اللي بتتكتب ردا على القصة دي و الإنشكاح اللي بيبقى فيه القراء ، تاني .. كأن المبدأ هو إنه المفروض إنه يغتصبها ، و الإستثناء إنه ما اغتصبهاش ، أنا شخصيا لو من أبو البنت كنت إديته بالجزمة على نافوخ اللي خلفوه ، هو الطبيعي يعني إن أنا أجوز بنتي لواحد فكر إنه يغتصبها في ليلة واحدة 10 مرات ؟!!!..




يا سادة يا كرام فيه عالم بره بلادنا مليان ناس .. رجالة ما علمهومش المجتمع إن المفروض يبقى فيه لمبة خضرا بتنور و تقول .. إنطلق.. بمجرد ما بيشوفوا واحده جاية من على بعد كيلو متر كامل ناحيتهم لمجرد إنها واحدة ست ..و ستات ما علمهومش المجتمع إن المفروض يبقى فيه جواهم لمبة حمرا بتنور تقول .. خطر.. إبعدي عن المكان ده لحد ما نتأكد هل الرجل الموجود ده كلب كالعادة والا من القلة المحترمة وسط الرجال.




، خليني أستعير الجملة بتاعة "محمد أمين" في فيلم ثقافي اللي اتقالت على لسان الأخت الفاضلة "روبي" .. "صحيح ما اجتمع رجل و امرأة إلا و ثالثهما الشيطان .. لكن انتصار الشيطان عليهم مش مسألة حتمية" ...



يعني مش لازم بمجرد ما يلمحوا بعض يسيبوا حالهم و اللي وراهم و اللي قدامهم و يطرطقوا ودانهم و يركزوا كل تفكيرهم و هم بيدوروا حواليهم .. يا ترى إنت فين يا شيطان . .










Sunday, July 03, 2011

عشان كده




لما كنت صغنتوتة
كنت باحب أتفرج على حفل الختام قوي
أنا و ماما
نخمن مين اللي هيكسب و مين مش هيكسب
و نراهن بعض على الجوايز
نتفرج ع الفساتين
مين جه و مين ماجاش
ننبسط بالتنظيم لو طلع منظم
و نتعصب لو شوفنا أي قلة نظام
كانت ليلة بتاعتنا إحنا الإتنين بس
من الليالي اللي كنت باحس فيها بحلاوة إننا مش بس أم و بنت
لأ دا احنا كمان إتنين أصحاب
عشان كده في ديسمبر اللي فات
لما كسبت الجايزة دي
(رغم إني ماقدرتش وقتها أروح أستلمها)
ما كنتش فرحانة بس عشان دي جايزة أحسن سيناريو لمسلسل كوميدي في 2010
و إني باخدها عن أول سيناريو كتبته في حياتي
ما كنتش فرحانة بس عشان حلمت من زمان إني أكسب جايزة زي دي و يتقال إسمي على مسرح زي ده
ماكنتش فرحانة بس عشان ربنا عوضني عن تعب سنتين كتابة و إن ربنا أجاب دعائي لما طلبت منه هدية حلوة في عيد ميلادي اللي كان قبل الحفلة دي ب 4 أيام
كنت فرحانة أكتر عشان حسيت إن ماما فرحانة معايا
حتى لو ماكنتش جنبي فهي أكيد حاسة بيا و بتدعيلي كمان
-
ليه ماقولتش من زمان ؟
كنت مخاصمة التدوين شوية

ليه باكتب الكلام ده دلوقتي؟
عشان ده الخن بتاعي اللي باحط فيه الحاجات اللي باحبها و بخاف لانساها أو لاتضيع

و كمان عشان عايزة أنفض التراب و أرش ماية و أرجع أستقرهنا تاني

عشان وحشتني المدونة
وعشان إنتوا كمان وحشتوني بجد


Friday, September 24, 2010

إنجليزي ده يا مرسي ؟


.
.

بعد نجاحها في إيطاليا

و فرقعتها في سويسرا

و دربكتها للنمسا

و قريبا شقلبتها لهولندا

كرامة للحاج أوباما و مراته أم ساشا

و بالغيظة في أبلة سارة بيلين و حزب "حفلة الشاي" اللي طالعلنا في المقدر جديد

تغزو بنت بلدكم الأبية الآنسة برايد بنت أبو برايد الأسواق الأمريكية


و للعلم برايد مش بتعمل كده علشانها ..و لا علشاني..و لا حتى علشانكم


علشان مصررر


أاااحبيبتي يا مصر يا مصر
أاااحبيبتي يا مصر
يا مصر






غلاف ألاجة أهه عشان ماحدش يقول حاجة

الترجمة ل نورا الطحاوي

و الناشر قسم الدراسات الشرق أوسطية بجامعة تكساس



حاليا بالمكتبات في دولة أمريكا الشقيقة و على أمازون دوت كوم

http://www.amazon.com/Want-Get-Married-Misadventures-Technicolor/dp/0292723970/ref=sr_1_1?s=books&ie=UTF8&qid=1285219305&sr=1-1


عشان خاطركم بس ب 10 دولار


بس اللي مش هيلحقه دلوقتي ..كمان أسبوع هيبقى ب16


و قد أعذر من أنذر
.
.

سمعونا زغروطة حلوة بأه



مش بالذمة أحسن من 13 عريس؟


:))
.


Monday, July 12, 2010

الحلم هيبقى حقيقة

فاكرين زمان أول ما بدأنا المدونة دي مع بعض؟


فاكرين لما كنتوا بتقولولي لازم تنشري الكلام ده في كتاب و أكيد هينجح


كنت باقول لنفسي أكيد بتبالغوا أو بتجاملوا أو بتهزروا


بس حصل و نشرنا الكتاب و نجح


عربي و إيطالي و ألماني و في السكة الهولندي و الإنجليزي إن شاء الله



فاكرين بعدها بشوية ..بعد العريس التاني أو التالت لما ابتديتوا تقولواالكلام ده ممكن يتحول لمسلسل تلفزيوني في رمضان


و أنا برضه قعدت أضحك و أقول ..يا سلام يا سلام ..و أنا إيه إن شاء الله اللي هيوصلني لبتوع التليفزيون و يعملولي مسلسل و كمان يتعرض في رمضان ؟..ده على أساس إن أنا أسامه أنور عكاشة أو يمكن رأفت الهجان؟


بس أهو حصل ..و بيحصل


إنتوا شكلكوا كده وشكوا حلو عليا أو مكشوف عنكوا الحجاب


كنتوا معايا في خطوات كتير على الطريق و أنا في كل لحظة حاسة إن كل حد دخل المدونة دي شريك في كل اللي بيحصل ده


يا جماعة ..ياللي هنا ..و يا اللي جم قبل كده هنا


شــكــرا


و دلوقتي مع ثمرة توقعاتنا و دعواتنا وأمنياتنا


برومو عايزة أتجوز


بطولة ....الجميلة هند صبري


إخراج .....الجميل رامي إمام


سيناريو و حوار أختكوا الصغيرة (يووه الكبيرة خلاص ما تزعلوش).......
غادة عبد العال






.
.
.
.

Tuesday, September 29, 2009

الترجمة الإيطالي

كان يا مكان في هذا العصر و الأوان بنت أمورة إسمها برايد بقالها مدة بتدور على عريس ..أيام ورا أيام و شهور ورا شهور و سنين ورا سنين..لحد ما أخيرا وصلت لنتيجة واضحة..مصر كلها عقمت عن إنها تنجب 3 أشخاص : نائب لرئيس الجمهورية ..مدرب ينجح مع نادي الزمالك..و عريس لبرايد

تسمع كلام طنطها حشرية مافيش فايدة ..تمشي ورا نصايح أونكل ديسكو ماتلاقيش ..تعمل مدونة ..تنشر كتاب..إنها تقابل حد عدل ..أبببدا..نهايته فقدت الأمل في الإنتاج المصري و إبتدت تفكر تخرج خارج القارة بحالها لعل و عسى..قوم إيه أتاري الدنيا ضلمة و المستقبل ملغوش في كل حتة في العالم دار نشر إيطالية محترمة إسمها
Epoché Edizioni
قالت يا بت يا برايد إنتي فاكرة الكلام ده عندكم إنتم بس ..تعالي شوفي السنيوريين اللي عندنا عاملين فينا إيه ..طول النهار قاعدين ع القهاوي ياكلوا كانيلوني و سباجيتي بولينيز و لا حد بيتقدم ولا حد بيتجوز ..و كلهم يا اختشي شبه بتوع لجنة السياسات اللي انتي بتقولي عليهم دول.. تعالي يا بنتي نترجملك الكتاب و نحط همنا على هم بعض..و أكيد السنيوريتات الإيطاليات هيستفيدوا من خبرتك الفظيعة في العرسان الكسر و مين عارف ..

البت برايد ماكدبتش خبر و قالتلهم جراتسي جراتسي..مولتو بيلا..إتكلوا على الله و ترجموا..حد واخد منها حاجة..إحنا مانقدرش نكتم على خبراتنا و مانفيدش بيها أخواتنا في الإنسانية إحنا ناس نعرف
ربنا كويس و مانعملش كده في بنات الناس


و هكذا أزف إليكم خبر صدور أولى ترجمات "عايزة أتجوز" للغات الإفرنكية الشقيقة
"عايزة أتجوز" بالإيطالي تصدر الأسبوع القادم في إيطاليا عن دار نشر
Epoché Edizioni

و ده هو الغلاف..قولوا رأيكم



و دي مدونة موازية عملتها دار النشر بالإيطالي لسهولة التواصل مع القراء و الصحافة الإيطالية مع إني أعدمكم إذا كنت فاهمة منها أي كلمة..لكن حلوة و دمها خفيف


http://cheilvelosiadasposa.blogspot.com/


و العقدة بأه إنهم عايزينني أكتب بوست بالإيطالي أشرحلهم الدنيا هنا ماشية إزاي رسالة من بنات مصر و شبابها لأمثالهم الإيطاليين كل واحد و واحدة يقترح موضوع للبوست ده لأن الكلام على لسانكم أساسا

هاه؟..إقتراحاتكم إيه؟
.
.
.

Thursday, September 10, 2009

سبب الغياب



تعاقد الاستاذ ابراهيم المعلم صاحب دار الشروق مع النجمة هند صبري لتقوم ببطولة المسلسل التليفزيونى الجديد ( عايزة اتجوز) وتم الاتفاق معها على بدء تصويره بعد العيد مباشرة بعد أن يتم الاستقرار على مخرج العمل وترشيح باقي الفنانين الذين سيشاركون في بطولته ليكون جاهزاً للعرض على الشاشة الصغيرة في شهر رمضان من العام القادم 2010.المسلسل مأخوذ من كتاب نشرته دار الشروق يحمل نفس اسم الكتاب للمدونة غادة عبد العال


.




http://www.masrawy.com/News/Arts/Stars/2009/september/8/hend.aspx



.
.

Saturday, May 09, 2009

امرأة واحدة لا تكفي





قصة جديدة في بيت العرايس و العرسان

Monday, April 06, 2009

تابع - الثاني عشر

الكل مستعجل يعرف حصل إيه بعد كده..طب مش تستنوا لما تعرفوا الحكاية بدأت أساسا إزاي ؟

ستوب ..فلاش باك..صور متتابعة بالأبيض و الأسود..أو الألوان مش هتفرق..المهم..من مده كده بدأت حالة من الهدوء تسود صيدليتنا الكريمة ..الأمور هادية و الأجواء خالية من بشاير أي عريس جديد لأي حد و بالتالي أعصاب الكل مرتاحة ..آه مافيش بارقة أمل في المستقبل لكن كمان مافيش أي مناورات تخللي حد يغل في نفسه أو ياكل في بعضه أو يصحى بالليل يصرخ مفزوع "نهى جالها..نهى جالها عريس" ..إحم ..مش نهى بالخصوص يعني ..ده مجرد مثال ..ليه ماعادش فيه مناورات صالونية ..مش عارفة بالظبط..تقولوا عشان الرجالة اللي يعرفوهم معارفنا خلصوا على كده ..عشان طلعت علينا سمعة هباب من كتر اللي بندألجهم على سلالمنا..عشان كلنا عدينا عتبة التلاتين و العتبة دي بالذات جزاز و سلمها نايلو في نايلو و محتاج عرسان ذوي مواصفات خاصة عشان يطلعوا عليه . المهم بعد تفكير عميق و مشاورات مستمرة أفتت واحدة من الموجودين بإننا بما إننا مش بتوع مصاحبة وقلة أدب و واضح كمان إننا مش بتوع زواج و استقرار يبقى أكيد أكيد إحنا نبقى "الديمو" ..وقفنا عند المستوى الأول بتاع مقابلة الصالون و مافيش أمل نطلع المستوى اللي بعده لأننا مجرد "ديمو"..فكرة نميسة و الله!..إرتحنا للنتيجة العبقرية دي و عيشنا في توافق و محبة و ود في ظل هذا الهدوء النسبي و الهدنة المعلنة من جميع الأطراف .. لكن للأسف ماكانش عندنا فكرة إن الهدوء ده كله كان يسبق العاصفة


العاصفة بتاعتنا المسماه بمدام زوزو..ماتعرفوهاش؟..لأ تعرفوها تعرفوها..كل واحد أو واحدة فيكم لو فكر شوية هيلاقي فيه في حياته مدام زوزو ..الست المشرقة دي المبتسمة دايما ماتعرفش ليه اللي دايما بتلبس حاجات فيها ورد كتير كده و ألوانها بتفكرك بالعيال اللي رايحين جنينة الحيوانات يوم العيد الصبح .. دائما و أبدا بتحاول تقنعك إن الدنيا لسه بخير و كيلو اللحمة هيرجع ب3 جنيه و نص و إن وزير التعليم بيموت في العيال بتوع الثانوية العامة و إن أحمد عز قصده مصلحة البلد بس هو اللي مش باين عليه و البني آدم لو بس يصفي نيته و يتسامح مع نفسه يقدر يتفرج على كل أفلام نادية الجندي مرة واحدة من غير مايجيله تسمم ولاحاجة ..حل لكل مشكلة و نظرة وردية للمستقبل تجيب لشخص "متفائل " زيي كمية هلاوس سمعية و بصرية ماحصلتليش من يوم ما رحت أطلع بطاقة إنتخابية من القسم اللي جنبنا
و سبحان الله يا أخي على الرغم من موضوع التفاؤل ده فمدام زوزو كانت كمان بتؤمن بمبدأ الفوضى الخلاقة بتاع مثلها الأعلى الست "كونداليزا رز" ..أي مكان تدخله وتخرج منه لايمكن يفضل على حاله ..من يوم ما اشتغلت في قسم الحسابات و هي عاملة زي الدبانة الرخمة تفضل تلف و تزن على كل مكتب شوية ..فجأة تلاقي المتخاصمين إتصالحوا و الأصحاب بقوا زي الإخوان و أعضاء الحزب تحت قبة مجلس الشعب.. اللي مشيه مش تمام بيتعدل و اللي ماشي طول عمره مستقيم يقرر إنه يتوكل على الله و يبقى مرتشي و تخرج هي من المكتب و على وشها إبتسامة إنتصار إنها قدرت تسيب بصمة في حياة الجميع


لكن كله كوم و اللي عملته في صيدليتنا ده كوم تاني..سيبكوا من إن نهى رفعت على جوزها قضية خلع ..ده حاجة مش غريبة ..كفاية الكام عين اللي خدتهم في الفرح ( منهم لله اللي كانوا السبب)..سيبكوا كمان من إنهم لحقوا مدام سندس على آخر لحظة قبل ما تسقي الباشمهندس شافعي شوب عصير ماية نار ..ده شيء كنا كلنا متوقعينه و كان منتظر من زمان ..لكن 5 خطوبات في أقل من شهر واحد؟..ورا بعض؟..دي تخرج تتكلم في التليفون و ترجع ..مخطوبة ..دي تخرج تشتري سندوتشين فول و ترجع مخطوبة..دي تستأذن و تدخل الحمام و ترجع برضه مخطوبه و كل خطوبه تحمل ماركة مدام زوزو المسجلة ..و مش الغريبة موضوع الخطوبات المتلاحقة دي..بجد مش غريبة..الأغرب إن أنا ما انفجرتش فيهم و في الصيدلية و في المستشفى كلها ..الموضوع تحسوا كده إنه عامل زي البلاستر اللي بتشدوه بسرعة من على الجرح عشان مايوجعش قوي ..و بعدين هاعمل إيه يعني؟..ماهو مافيش حاجة في إيدي أعملها ..يعني لو كانت واحدة فيهم إتخطبت عشان لفت لفتين في فرح كنت لفيت أنا 22 ..لكن أنا ما أعرفش دول بيتخطبوا على أي أساس؟..طيب..يمكن على حسب السن؟..أبدا ..أول تلاتة كانوا 32 -28-35 ..يعني مافيش ترتيب ..يمكن حسب اللون؟ ..برضه أبدا داحنا خرجنا من مرحلة "يا ريتني بيضا بضب ده البياض عند الجواز يتحب" مارين بمرحلة "حتى لوني قمحي لون خيرك يا مصر" لحد ماوصلنا لمرحلة "أسمر أسمر طيب ماله ..و الله سماره سر جماله" ..خلصت كل الألوان و الست برضه ما هوبتش ناحيتي . حسب المستوى الإجتماعي؟ ..حسب الطول؟ ..حسب نوع الموبايل؟..أجيبها يمين شمال.. مش فاهمالها نظام خالص.الله يلعن أبو الذل اللي يعمل في الواحد كده..لما حتى مدام زوزو مش شايفة إن فيه فيا أمل ..يبقى فاضل إيه تاني؟...في وسط الجو ده فجأه لقيت مدام زوزو بدأت تحوم حواليا زي النحلة اليتيمة..بتقدم رجل و تأخر رجل و أنا راسمه البراءه و عاملة إني مش فاهمة هي عايزة إيه بالظبط لكن قلبي بيفرفر جوايا زي الفرخة الدايخة لغاية ما قربت مني و جابتها على بلاطة




-هو انتي يا دكتورة مش ناوية تتجوزي بأه والا إيه؟
- جواز ؟..جواز إيه يا مدام زوزو اللي بتتكلمي عليه ؟ أنا ما بافكرش في الموضوع ده خالص ..أنا لسه صغيرة
- صغيرة ؟..صغيرة إيه يا دكتورة إسم الله على مقامك
-إحم..مش موضوعنا ده يا مدام زوزو و في النهاية يعني كل شيء نصيب و الحاجات دي مش بإيد حد
- مين قال كده ؟..كل حاجة و ليها حل ..إنتي بس ترمي بياضك و كل شيء هيبان
- أرمي بياضي إزاي يعني؟..الله ..إنتي بتعرفي تشوفي البخت؟
- بخت إيه ..يا دي النيلة..كليات "كمة" إيه اللي بتدخلوها دي بس؟..شوفي يا دكتورة..أنا باخد 2 ..واحد قبل و واحد بعد
- 2 إيه ؟..حقن والا لبوس؟
- يا دكتورة 2 ..ألفين جنيه ..ألف قبل الخطوبة و ألف بعد تلبيس الدبل
- نعمآاااه..دلوقتي فهمت ترتيب خطوبة البنات ..يخرب بيوتهم ..دول بيتخطبوا حسب أدوار الجمعية بتاعة مدام عواطف ..اللي تقبض بالشمال تلبس دبلة في اليمين
- إسم الله عليكي ..هاه..نقول مبروك؟



في بيتنا الهادي الجميل ماما كانت في إحدى حالتها المعتادة من السلام مع النفس ..بتدبدب على الأرض و بتشد في شعرها و بتجز على سنانها عشان ما تتهورش و تاكل دراعي من كتر الغيظ



- وقلتلها لأ؟
- طبببعا
- ليه يا نايبتي التقيلة ؟
- و أنا أدفع 2000 جنيه ليه؟
- و ماتدفعيش ليه إن شاء الله؟..مافيش فايدة فيكي طالعة جلدة لجدتك ..كتير ال 2000 جنيه ؟..متسخسراهم؟..إحنا مش لسه شاريين تلاجة ب2000 جنيه ..عريسك ده مش هيبقى زي التلاجة؟
- إحتمال
- و الجزمة اللي سيادتك لسه شارياها ب200 جنيه ؟..يعني العريس ده خسارة فيه 10 جزم؟
- قلبي حاسس إنه هيحتاج أكتر من كده
- يبقى إيه بأه؟
- يا ماما على آخر الزمن هادفع فلوس عشان أتجوز؟..حصلت إني أشتري عريس
- و ماله ..مش ده التطور اللي انتي دايما بتقولي عايزاه ؟..مش بتقولي مش عايزة حد يشتريني بفلوسه ؟..إشتريه انتي ..على الأقل في أي خناقة تبقي انتي اللي كاسره عينه مش هو اللي كاسرلك عين
- يا ماما بس ..
- بس خلاص ..اجري هاتي ألف جنيه من المخبأ و إبقي ادهوملها بكره الصبح ..إجري ياللا


و تاني يوم الفلوس اللي ماما مخبياها تحت أنبوبة البوتجاز بعد ما بابا إكتشف المخبأ القديم ورا عداد الكهربا كانت في إيد مدام زوزو.. بصتلها بازدراء ورمتها في شنطتها بإهمال وسط رزم تانية كتير ..مصري على خليجي على يورو على دولار..الست طلعت معروفة على الساحة الدولية..و أنا كنت نايمة على وداني كل ده ؟ .. عموما أما نشوف أخرتها إيه
ميلت عليا و قالتلي بأسلوب مغري كده

..
-

و بالنسبة للعريس ده بأه ..إنتي محتاجة تشوفيه؟
- نعم ؟..أمال إنتي واخدة 1000 جنيه ليه ؟..هتسمعيني صوته على نجوم إف إم؟
- لا يا دكتورة ماهي كل حاجة بتمنها ..أنا لغاية دلوقتي لا قلتلك إسم و لا وظيفة..ممكن قوي أجيبلك صورة شريف إبن أختي و أقولك هو ده.. آه..خدي بالك إنتي بتشتري سمك في مايه
- عايزة إيه يعني؟

- مش كتير 750 بس

- حاضر..الله يلعن أبو الذل اللي يعمل في الواحد كده

و دفعت زي الجز..الشاطرة طبعا و طلعتلي صورته ..إستعديت بأه عشان أقول سنانه زي شريط السكة الحديد و مناخيره شبه عمر أفندي و عينيه بتحدف يمين و كل الأشياء اللطيفة اللي أنا باقولها على عرساني دي بس بصراحة فرملتني الصورة المرة دي
شوفوا هو باختصار شكله إبن حلال مبتسم إبتسامة سهتانة كده شوية و متصور في بوز سخيف قوي و هو حاطط إيده تحت دقنه قال يعني بيفكر في حل لمشكلة أنابيب البوتجاز بس شكله متربي يعني ..وسيم آه ..بس بشنب ..رغم إني ماباستظرفش الشنبات لكن واضح إنه حاسس إن مناخيره مهمه فالراجل حب يشد تحتها خط عشان البشرية كلها تاخد بالها منها ..حقه برضه..شعره بني كده شوية و في مرحلة متوسطة بين الموكيت اللي كان مركبه راغب علامه أيام مغرم يا ليل و التنده اللي كان رافعها كاظم الساهر في سلامتك من الآه ( الحلوين مواليد التسعينات اللي هيقولولي مين دول يا طنط و أغاني إيه دي يا أبله هاشوطهم بره البلوج ..عندك اليوتيوب يا شاطر منك ليها و بلاش أسئلة مستفزة يا إما كل واحد يروح يلعب قدام بيتهم ..آه) ..و بغض النظر عن إنه ماعداش إختبار الغرز ..لكن قلبي إنشرحله و حسيت إن ربنا هيكرمني المرة دي ..خلاص..الإتناشر تابتة ..ماهي أربع تلاتات بأه..و موضوع الغرز ده نبقى نتصرف فيه بعدين..في إيدنا يعني


- هاه ..تقابليه؟
- طبعا
- طب تدفعي كاااام؟



الست زوزو الله يكرمها دبرتلنا معاد لقاء على أرض محايدة ..لا صالوننا ولا صالونهم ..صالونها هي و كتر خيرها نظرا للأزمة الإقتصادية العالمية ما أخدتش في الموضوع ده غير 750 جنيه ..جه هو و أخته الكبيرة ..ست طيبة و لطيفة و بنت حلال و رخمة و تلمة ..الأفريدج بتاع أهل العرسان يعني ..مالحقناش نقعد و مدام زوزو راحت شاقطة ماما تحت دراعها اليمين و أخت العريس تحت كوعها الشمال و سابولي ساحة المعركة ..قعدت قدام الباشمهندس عصام كالعادة عرقي مرقي و هو زي وكيل النيابة اللي وقع تحت إيده حرامي أهبل ناوي يعترف بكل حاجة ..أسئلة.. أسئلة ..أسئلة..أحلامك طموحاتك هواياتك طبخاتك صحباتك إسمك سنك ..مدفع سريع الطلقات ..بس أنا منشكحة جدا ..التدقيق ده معناه إنه بيتوخى الحرص و داخل جد جدا ..مش قاعدة طياري و خلاص..يا سلاااام ..أيوة كده ..وداعا للديمو و أهلا بمستويات المحترفين
خلصت القاعدة و روحنا ..طبعا بعد مادفعنا لمدام زوزو 400 جنيه تانيين و أول ماحطينا رجلينا جوه الشقة رن التليفون


- مبسوط ..مبسوط قوي ..أمال ..بس عايز يشوفها مرة كمان

ماما اللي الضربات اللي ماكسرتهاش قوتها و اللي اتعلمت من جروح معارك القسمة و خدوش حروب النصيب فحبت تعمل واعية
- ما فيش مقابلات تانية ..إحنا هنفضل ندخل و نطلع ؟
- و ندفع ؟
- بس عايز يعرفها أكتر
-و ال7 ساعات اللي قعدهم معاها دول مش كفاية؟
- و الله هو ده نظامنا يا حاجة ..مش عاجبكم يبقى...
- لأ ..عاجبنا عاجبنا..الله يلعن أبو الذل اللي يعمل في الواحد كده


و استمرت المقابلات خلال شهري يناير و فبراير على التوازي ..18 مقابلة في شهرين لغاية ما خلاص ..برايد حفظت عصام و عصام حفظ برايد ..كل أحلامي و طموحاتي و أحلامه و طموحاته ..و هواياتي و صحباتي و هواياته و صحباته ..كلهم إندمجوا مع بعض و قربنا خلاص نبقى زي بيرت بلاس ..اتنين في واحد..لكن برضه لسه عايز يدرس و يدقق و لما طلب يقابلني للمرة التسعتاشر ماما كانت خلاص روحها في مناخيرها

..هي كلمة ..لازم يبقى فيه إرتباط ..عايز يشوفها تاني يتفضل في بيتنا ..و يقرا الفاتحة و بعدين يبقوا يتعرفوا على بعض لغاية لما نلبس دبل
- أيوة بس..
- ماتخافيش جمعي كل اللي كنتي هتسلكيه و احنا هندفعهولك جملة مرة واحدة ..بس بعد قراية الفاتحة
- مش تقولي كده م الصبح يا حاجة..لولولولولي..مبروك مقدما إن شاء الله..أنا هاكلمهم و أحدد معاد ..بس باقولك إيه يا حاجة ..أصل أنا رصيدي خلص ..يعني عشان أكلمهم محتاجاكي تحوليلي 600 جنيه



و جه اليوم الموعود و ماما خلتهم قروا الفاتحة على عتبة باب الشقة قبل ما يحطوا رجلهم جوا الصالون اللي قربنا نتشائم منه خلاص ..و حصلت الموقعة اللي حكتلكم عليها المرة اللي فاتت دي

قاعدة جنب الحلو الأمور اللي كان عامل نيولوك بمناسبة قراية الفاتحة كان شكله غريب شوية شعره بقى شبه فروة علي حميده أيام لولاكي (إياكوا حد يسأل) و لابس قميص برتقاني و حاجات دهب كتير كده


- نعمممم ؟..إسمي إيه يعني إيه؟..هو الشريط سف والا إيه؟..ما انت عارف إسمي و عارف كل حاجة عني و عن كل اللي أعرفهم ..دي حتى مقاسات جزم أصحابي انت حافظهم دلوقتي يا عصام


- إحم..بس أصل..
- أصل إيه؟
- أنا..
- إنت إيه عصام ؟
-
أنا مش عصام..أنا حسام



وأنا أصوووت..و مدام زوزو تهديني.
- يا دكتورة ما هي هياها ..دول توأم يعني مافرقتش كتير

و أنا أصوووت و أخته تفهمني
- أصل عصام مهندس له مكانته برضه و بعد تفكير قرر إنه مش هينفع يتجوز واحدة فوق التلاتين لكن حسام دبلوم صنايع يعني نفسه حلوة و ماعندوش مانع يشيل

و أنا أصوووت ..و ماما تحاول تقنعني
- يا بنتي خلصينا بأه ..عصام حسام..كفاية اللي احنا كعيناه ده كله ..طب إتخطبيلك بيهم أسبوعين

و أنا أصووووت و فجأه بابص حواليا لقيت كل جيراننا اتلموا عشان يطقسوا و الشماتة في عينين البت هند هي اللي خلتني كلبشت في إيد عصـ..حسام و طلعتلهم لساني قد كده


- إيه ؟..بتبصوا على إيه ؟..عمركوا ماشفتوا واحدة مبسوطة ؟
.
.
.
ياللا أسبوعين يفوتوا ولا حد يموت



الله يلعن أبو الذل ..الله يلعن أبو الذل..الله يلعن أبو الذل




ألف مرة

Thursday, March 05, 2009

الثاني عشر

بص ..شوف..برايد بتعمل إيه؟..بص..شوف..برايد بتعمل إيه..هييييييييييييييييييييه..هيييه..هييه



دي حضرتي..باطنطط ع السرير ..باشد في شعري و باااااصرخ ..بش بشويييييييييييش..بيني و بيني ..ما يصحش ..فيه ضيوف و عيب يحضروا نوبة الهستريا المازوخية الماركسية الكستنائية دي ..باخرف ..آه باخرف باين ..ثانية واحدة كده
.........آاااااااااااااااااااااااااااااااااه..............


دي برضه أنا رحت في آخر كورنر في الأوضة و انطلقت بأقصى سرعة و رشقت راسي في الجدار ..بتوجعني أهيه يعني مش باحلم..كنت أقرص نفسي أسهل؟..تخيلوا آه..بس كده زيادة توكيد برضه
أنا فرحانة ..فرحانة..فرحانة فرحة أيمن نور و هو خارج م السجن..لأ ..فرحة ممدوح إسماعيل يوم ما أخد براءه..برضه لأ..فرحانة ..فرحانة فرحة أمير عبد الحميد يوم ما صد كورتين ورا بعض..أيوااااه..هي فرحة أمير


اليوم هو اليوم التاريخي المنتظر من مجموعة جميع جموع الشعب المصري جمعاء..فاليوم برايد إتقرت فتحتها ..رغم كل الصعاب و عكس كل التوقعات و بغض النظر عن إن كل أطراف الموضوع في لحظة قراية الفاتحة نسيوها تحت تأثير الصدمة ..لكن ربنا فتح علينا و قريناها ..قريناها 23 مرة ورا بعض عشان نتأكد و مايبقاش فيها شك


و أحب أقولكم إن من النهاردة فيه تاريخ جديد ..مش زي زمان كده أيام و شهور و سنين لأ لأ لأ ..إنسوا بأه الكلام ده ..أرفسوا الأزمنة دي خالص ..من النهاردة سيستم نوفي ..عصر مختلف ..فكر جديد (مع تحيات الحزب الوطني)..دلوقتي لازم تعلموا الأحداث باليوم الفاصل ده..يعني مثلا تقولوا و انتخب أوباما رئيسا لأمريكا قبل شهر واحد من قراية فاتحة برايد..و ورث جيمي حكم .....و الا بلاش ..(حد قاللي البلوج دلوقتي أكيد متراقب..و أنا لسه قارية فاتحة في الصالون مش عايزة أقرا "قل يا أيها الكافرون" في حتة تانية)


هييه ..هييه..
هشششششششش..بلاش فضايح


فتحت باب أوضتي بعد ما مسحت الدم من على وشي (مش لسه فاتحة دماغي قدامكم من شوية؟!) و إتسحبت على أطراف أصابعي العشرين من أمام صالوننا المتواضع حتى باب الشقة و فتحت باب الشقة و خرجت
أبدأ بمين ؟..أبدأ بمين؟..هي فيه غيرها؟..أماني حبيييييبتشي..هي و المزغودة في قلبها بنتها


-يعني إيه؟..يعني إيه إتقرت فتحتك ..مين اللي قراهالك؟
- عكس كل أحلامك يا أماني مش واحد تربي
(بهستريا مصحوبة بالفزع)..

- أمال واحد إيه؟
-واحد صفر..واحد سحلب..واحد راجل يا أماني هيكون إيه؟
-(باستنكار بالغ تتقنه المهفوفة المضروبة المسخوطة)

يعني إنتي يا طنط خلاص مابقتيش "عابس"؟


و إنخرطوا في بكاء مرير و البت هند كانت عايزة ترمي نفسها من فوق السلم و أماني لحقتها على أول السلمة ..قلبي الطيب وزني أمد إيدي و أزقهم لأنه كان حاسس بإشتياق السلم لأي متدألج بعد ما إمتنعنا عن دألجة العرسان بعد تلقي شكاوي مصلحة رصد الزلازل بحلوان..لكن رجعت في كلامي و سيبتهم لربنا اللي ملامح غضبه بدأت تظهر عليهم ..فيه طفل في الدنيا يبقى ألدغ في النون؟..خدلي حققققي مننننهم يا رب


طب كده و خلصنا على أماني ..طب و بقية العمارة ..ياللا بأه منهم لله..أنا هاعمل عقلي بعقلهم ؟..أنا لازم تسودني روح التسامح و التآخي و الغفران..أنا مش هاقولهم حاجة..أنا بس نفسي أعمل طبخة خفيفة كده على العشا و عندي نقص في بعض المقادير ..و الجيران لبعضيها و لقمة هنية على حساب مية و هنيالك يا فاعل الخير و الثواب..أنا مش هاستلف كتير هم بيضتين و شوية سكر و كبشتين قرنفل و حبة سبانخ على نعناع كده هاعمل صينية مسقعة تجنن..بس لسه هانزل دور دور؟..لأ فكك من الحركات الصيبيانية دي ..فيه طريقة أسهل بكتير


مش باقولكم ..فكر جديد؟
و كأي طفل بريء في الثامنة بيحترم نفسه ضربت كل الأجراس و نزلت زحلقة ً على الترابزين و وقفت في بير السلم مستنية خروج جيراني الأعزاء ....ثواني و امتدت الرؤوس و تفنجلت العيون و إشرأبت الأعناق و تشنفت الآذان و شحنت كل قرون الإستشعار.. أخدت نفس عمييييق و في جملة واحدة ..خبطهم خبطة رجل واحد


(أنا اتقرت فاتحتي يا غجججججر)


قلت يا بشر ..بس كان نفسي قوي أديهالهم في الوريد..ياللا في كتب الكتاب بأه و عليكم بخير


أما عن ردود الأفعال المرصودة فبعضهم بقه إتعوج على جنب بادئا رحلة الشلل النصفي و بعضهم دخل في موجة ضحك هستيري فشر علاء صادق على مودرن تي في بينما إنخرط الباقين في بكاء يقطع نياط القلب و خياشيش الفؤاد..نزلت دموعهم بردا و سلاما على قلبي اللي كان صارر و شايل منهم شيء و شويات و انطلقت أدور على ضحايا آخرين ..عم عبدربه البواب و مراته سها (النسخة القناوي من مهند و نور) عم محمد المكوجي و مراته مسعده (النسخة البورسعيدي من براد و أنجلينا) و مسيو مصطفى الكوافيرو مراته مدام سوسووه( النسخة الشبراوي من بكيزة و زغلول)


طنط آمال اللي كانت مرة بتنشر الغسيل و نقط عليا و أنا واقفة أستني التوك..أأ..الليموزين الي بتوصلني الشغل كل يوم و لما إعترضت قالتلي
هدوم العيال بكره تعرفي ..والا مش بكره قوي ..بعد بكره والا حاجة
و قعدت تضحك قوي مش عارفة على إيه

و سواق التاكسي اللي قاللي بحرقه قوي لما فاصلته في الأجرة ..
ربنا يهدكوا ..ربنا يهدكوا بأه ..اللهم عليك بكل تاء تأنيث ..

غالبا كان أصله مدرس عربي بس ربنا تاب عليه

و الشحات اللي ع الناصية اللي كل أما يشوفني يقوللي

ربنا لما يحب يبتلي بني آدم يسلط عليه عقله
كل ده علشان ما بيعرفش ياخد مني غير 3 جنيه و نص كل يوم..


و أم محروس بتاعة اللبن اللي بتبرطم
" ما يقعد ع المداود إلا شر البقر"


..إحم ..هو أنا ليه ماعزلتش من" المنتقة" البيئة دي لغاية دلوقت؟


المهم خلصت الجولة المكوكية و اتأكدت إن الأفراح عمت جميع أنحاء مصر من أول السلوم و حتى معبر غزة و أكيد الإخوة الفلسطينيين عدالهم الخبر من نفق من الأنفاق ووقفت أفكر طب بقية الناس اللي ماشية في الشارع اللي ما وصلهمش الخبر هتعرف إزاي إني مقري فتحتي؟..اللي مخطوبة بتلبس دبلة في اليمين و اللي كاتبة كتاب بتلبسها في الشمال..طب و اللي مقري فاتحتها دي يعرفوها إزاي؟..إيه الظلم ده؟..لازم يبقى فيه دبلة كدليل دامغ ..أممم..أحط دبلة في مناخيري مثلا ..مش على جنب لحسن اللي ع الجنب التاني ما ياخدوش بالهم ..أنا هاحطها في النص ..عشان ماحدش يتجاهلها بأي شكل من الأشكال .. ماشي يا بشر ..من النهاردة ماحدش له عندي حاجة و لا حد يقدر يفتح بقه بنص كلمه ..و لسه بكره لما أروح المستشفى و أفجر في وشهم الخبر ..كابووووم..أكبر قنبلة في العصر الحديث ..خلاص خلاص من النهاردة مافيش يا عيني ..مافيش معلش..مافيش ربنا يفك عقدتك..مافش ربنا يشفي..مافيش مافيش.خلاص يا بشر ..فكر جديد ..بصيت حواليا على الحي اللي إتكبس كبسة وكيل وزراة التعليم يوم ما سقط في امتحان الكادر و شوية الحياء اللي ماما كانت بتعملهوملي و أنا صغيرة سندوتشات هم اللي منعوني أجري و أطلع لساني لكل بأف و بأفه لسنوا عليا من ورا ضهري و إدوني في جنابي كلمتين لكن خلاص كل الضغائن دي رميتها ورايا عشان ربنا يكرمني و لأني بفكر إيه..أييوة ..بفكر جديد


شوية كده و جالي إحساس غريب ..حسيت إني ناسية حاجة ..أو ناسية حد..مين مين؟..مين يا بت يا برايد مين؟
يوه ..العريس..نسيت العريس


جري كنت واخده السلم تلاتات تلاتات و قلبي واقع في صباع رجلي الكبير ..لحسن يكون إتقمص ..مصيبة ليكون زعل..يا خوفي ليكون أخد على خاطره و قال حقي برقبتي و خلع..لكن الحمدلله لقيته لسه قاعد و على وشه نفس التعبير اللي كنت سايباه شايله على وشه الجميل..آه جميل..لأ ما إحنا لاغينا النظام القديم ..بتاع إلهي ينشك في نواضره ..إلهي مايوعى البعيد ..ضربه في قلبه و قلب اللي خلفوه ..كل الكلام ده مسحناه بأستيكه و بدأنا منهج تركي محسن..مش قلتلكم فكر جديد؟


دخلت لقيت ماما و بابا مسليين العريس بفاصل من البكاء الراقي الرقيق ولا شيكابالا في آخر ماتش ..ماما دموعها كان وصل منسوبها لحوالي نص قصبة رجلها و بابا بينشف دموعه بكمه عشان ماما كانت واخدة منديله بتعض عليه بدل ما يعلا صوتها بزغرودة سعيدة و هي التي أقسمت ألا تطرق السعادة باب شقتنا إلا لما تغورني منها على أي داهية


مدام زوزو فضلت تغمز لأخت العريس غمزة ذات مغزى و أخت العريس مطنشة ..لغاية لما فتحت شنطتها و لمحت حاجة بتلمع كده راحت أخت العريس قايمة جري و سحبتها و راحوا خارجين ..ماما قامت هي كمان و سحبت بابا يكملوا عياط بره و كفاية فضايح قدام الناس


و أنا قعدت قدام العريس الجميل..آه جميل ..ما إحنا قلنا ..فكر جديد.. الأستاذ بتاعي..سبعي..جملي..باعتبار ماسيكون


و هو قعد يبصلي بصته اللي أغدقت عليا السعادة من كل الجوانب..عارفين بصة العريس لعروسته المندهشة دي و كأنها أجمل حاجة و أغرب حاجة و أعجب حاجة شافها في حياته؟
البصة دي اللي بتحسس العروسة في كل لحظة و كأن عريسها أول مرة يشوفها في حياته

نظرة إندهاش على إستغراب على تساؤل


و فجأة قرب ناحيتي و فتح بقه عشان يتكلم ..يا سلااااام يا ترى الكلام بعد قراية الفاتحة بيبقى زي الكلام اللي قبلها ؟..طبعا لأ


غمضت عيني متوقعة الجملة الرقيقة اللي هيقولها دلوقت و سمعتها ..و قالها


أأأأأ...إنتي قولتيلي إسمك إيه؟
نعممممممممممممممم



بقية القصة تتابعونها في الحلقة القادمة من برنامجكم المفضل
خلف الأسوار ..

Sunday, February 08, 2009

عروسة جديدة


بعد نفاد الصبر و تبدد الأمل و عدم وجود أية بشائر في الأفق لقصة عريس جديد ..يضطر بيت العرايس و العرسان أن يفتح أبوابه على مصراعيها للعرايس ..هو ما حدش من الرجالة بياخد مقالب والا إيه؟..إحنا اللي بنشربها بس؟..آه يا غلابة يا احنا ..المهم ...نقدم لكم بيت العرايس و العرسان في أحدث إنتاجاته ..القصة التي إنتظرها الجميع في اليابان و الصين و إكراما لشعب مصر الطيب نذيعها عليكم من شبرا و حتى السنبلاوين


إليكم



من أول نظرة




و فيه يا جماعة برواز محندق كده لأختكم الصغيرة-يوووه الكبيرة- في جريدة الشروق الجديدة بعنوان "سوسة المفروسة" ..أيوة أنا "سوسة" للي كان لسه ما يعرفش ..لكن محتوى البرواز مالوش دعوة بمحتوى المدونة خالص دي شوية حاجات باتفرس منها قالولي ما تكتبيها و نتفرس كلنا مع بعض..و دمتم


Monday, January 19, 2009

المجلس القومي للرجل

يا أخي البنات مقصفوين الرقبة دول خلاص إستقووا و افتروا

إفتروا إيه ..قول توحشوا ..البنت من دول بقى يندب في عينها رصاصة

رايحة الشغل ..جاية من النادي ..رايحة الدرس ..راجعة من السينما

لا بقوا يتثبتوا ولا يتظبطوا و كله كوم و اللي حبست الواد اللي كان بيعاكسها دي كوم ..فين بنات زمان ..ولا واحدة كانت بتفتح بقها

و كل يوم مؤتمر ..جمعية

لأ و مجلس قومي للمرأة كمان

طب و إحنا مالناش مجلس ليه؟

آه صحيح ليه؟


و قد كان ..قررنا نحن الإخوة الرجال المقهورون إننا صحيح رجالة ..بس من زمان ماوقفناش وقفة رجالة ..ضد سيطرة المرأة على كل مجريات الحياة..ضد زحف جحافل النساء و شراذم الفتيات على كل المهن و المواقع ..ضد مشيهم في الشارع ..ضد ركوبهم الميكروباصات ..ضد إعتراضهم لما حد يمد إيده كده والا كده ..ملعونييييين في كللللللل كتاااااااااب ..ما هم اللي بيجيبوه لنفسهم ..اللي ماشية لوحدها ..عشان نفسها تتعاكس..و اللي ماشية مع أبوها والا أخوها و إيش عرف الناس مين ده إن شاء الله ..و اللي راكبه عربية لوحدها ..مش عارفه إن الموضوع ده بيثير الغرائز و اللي راكبه مع واحد جنبها ..مش عارفة إن شرف البنت زي سلك الفرامل ؟..اللي لابسه قصير ..أستغفر الله العظيم ..و اللي لابسه طويل ..إلهي تولعوا بجاز ..ما احنا بنفضل نفكر يا ترى اللبس الطويل ده مخبيه تحته إيه؟ ..اللي خارجة في العيد الصغير دون أي إعتبار لإن الناس لسه خارجة من صيام ..و اللي خارجة في العيد الكبير و الناس نفسها مفتوحة ع اللحمة ..و كله كوم و اللي خارجة في عيد العمال دي كوم .. ما احنا معذورين لما نظن فيها الظنون لأن كل الناس عارفة إن عيد العمال ده هو عيد "المكن" ..ولا سابوا شغلانة إلا و اشتغلوها ..ولا سابوا دراسة إلا ودرسوها ....خايليننا في الرايحة و الجاية ..ماتكنوا في حتة و تريحونا بقى ..و تقعدوا في بيوتكم و تسيبونا ناكل عيش

و لهذا قررنا نحن (مجموعة من الصحفيين و أساتذة الجامعة و المهتمين بشئون
المجتمع و حقوق الإنسان) إننا نقوم بإنشاء مجلس قومي للرجل ..أسوة بالمجلس القومي للمرأة و مافيش حد أحسن من حد..أما عن مبادئنا فهي كما يلي


المبدأ الأول : إذا رأيت فتاة أو سيدة تتعرض لموقف سيئ في الشارع لا أساعدها..


ده على أساس إن الرجالة مقطعين بعضيهم مساعدات و الحكومة نزلتها على بطايق التموين عشان كل راجل مايستعبطش و يساعد ست واحدة و بس


..
المبدأ الثاني: مقاطعة جميع المحلات والشركات التي تمتلكها أو تعمل بها فتيات أو سيدات..

قشطة جدا .. ..كده هتقضوا حياتكم فول و كشري و عصير قصب ....بدل المقهورون في الأرض,,هتبقوا المنتفخون في الأرض.. صحة و عافية إن شاء الله
.


.المبدأ الثالث: مقاطعة المنتجات التي تظهر في الإعلانات التلفزيونية التي تقوم بها فتيات أو سيدات..
طب دي بأه جايبة من أول السمنة و الشاي لغاية إعلانات "خللي السلاح صاحي" الشهيرة ..الإعلانات الوحيدة اللي مافيهاش ستات هي إعلانات مصلحة الضرائب.. خللي الضرايب بأه تنفعكم بدل السمنة و الشاي و....أي حاجة تانية يعني


المبدأ الرابع: إذا كنت صاحب شركة أو محل أمتنع عن تعيين الفتيات والسيدات وإذا كان لدي موظفات أقوم بفصلهن من العمل
طب إعملها كده ..أبو وردة هيسمعوه و هو بيعمل زووووو فوق نافوخك من آخر حارة في الصين


المبدأ الخامس: إذا كنت سائق تاكسي أو ميكروباص فلا أقوم بتوصيل النساء
عادي..هنقضيها تكاتك ..و يا توك توك الغرام يا ..مقرب البعيد


المبدأ السادس: المطالبة بالمساواة بين الذكور والإناث في تأدية الخدمة العسكرية
و الله ماعندنا مانع ..سلمونا انتوا بس الجيش ده 3 شهور و اتفرجوا عليه بعدها ..جمعيات و أجازات و أذونات رضاعة ..احنا ما نتأخرش أبدا عن خدمة الوطن


و تتوالى المباديء حتى المبدأ الرابع عشر : الإمتناع عن الزواج من أي فتاة حاصلة على أكثر من الإعدادية أو مؤهل متوسط على الأكثر..
دي شكلها تنفيضة قديمة من الفيونكة أيام الجامعة يا برنس ..


و إذا كنت أعرف شخص متزوج من مصرية أقاطعة لأن الذي يقبل الزواج من مصرية في ظل القوانين المعمول بها ليس رجلا..
هيييه ..مسكوا في بعض..مسكوا في بعض


أما أكثر مباديء الجمعية أهمية على الإطلاق هو المبدأ التاسع عشر و الأخير: إذا دخلت مصر حربا لا أدافع عنها..
ده علشان مصر مؤنث مثلا والا إيه؟


العضوية مقتوحة لكل المقهورين من كافة الأعمار و الخلفيات ..
و لا عزاء للسيدات
.
يا وكستك يا برايد إنتي و اللي زيك ..هم دول اللي فاضلين بعد اللي راحوا في الحرب و غرقوا في العبارة و اللي حاجزين في حادثة القطر اللي جاية؟..عليه العوض و منه العوض
لنا الله يا بنات
.
.
------------------------------------------------------------------------------------------

أخبار معرض الكتاب


1- يوم الخميس 22 يناير الساعة 12 في المقهى الثقافي بمعرض الكتاب ..ندوة فظيييييعة ..شنيييييييييعة ..باينة من إسمها " أدب المدونات صرخات شباب أم أدب كيلينيكس" أختكوا مدعوة تتكلم فيها و حاسة إنها هتنضرب...اللي يقدر ييجي يحوش ما يتأخرش و اللي يعرف أي صعايدة بالشوم ..يجيبهم و ييجي ..و ربنا مايرميكم في ضيقة


2- حفل توقيع مدونات الشروق في جناح الشروق في المعرض يوم السبت 24 الساعة 5 ..اللي معاه الكتاب و عايز توقيع ..و اللي لسه ما اشتراهوش..و اللي خمس فيه السنة اللي فاتت و ضميره بيوجعه ..يتفضل ..و اللي انكسر يتصلح ..خليك من المحظوظين اللي هيشتروا الطبعةالخامسة ..خمسة ..واخد بالك؟ ..الطبعة الخامسة ..الساعة خمسة
و كل سنة و انتوا طيبين


Sunday, December 21, 2008

حاجة غريبة




صحيت النهاردة الصبح من النوم على سلسلة من الحوادث الغريبة








أولا بابص لوشي في المراية مالقتش أثر لأي تجاعيد





فتشت في شعري كويس ..مافيش ولا شعرايا بيضا






سناني جامدة (ماشاء الله يعني) ال35 سنة كاملين مش ناقصين ولا واحدة (آه هم 35) و مايتهيأليش هحتاج أركب طقم النهاردة








إبتديت أستعد عشان أنزل الشغل ..و سبحان الله..لا جه في دماغي ألبس قميص كاروهات أحمر في أخضر تحت فستان موف في أصفر في زمردي له رفارف من ع الجنبين ..و لا جالي هاتف إني أفرق شعري من النص و لا هفة إني أنزل أشتري 6 كتاكيت من عند أم إيمان بتاعة الفراخ و أحطهم جوه برنيطة و أشيلهم فوق دماغي







نزلت الشارع و أنا متوجسة خيفة (معلش عندي دي المرة دي) ..كل أما يمر جنبي عيل صغير أتشنج و أستعد عشان أطلق ساقي للرياح (آخر مرة و الله)











الغريبة لا لقيت العيال بيحدفوني بالطوب و لا إتلموا حواليا و إستوحوا لحن من ألحان سلطان الطرب مصطفى كامل و ألفولي أغنية بتقول "الع...أهي أهي"






ركبت الميكروباص..ماحدش واخد باله





روحت الشغل ..برده ما فيش أي حد واخد باله من أي حاجة







لا زمايلي و لا العيانين ولا حتى المدير أصدر قرار بفصلي عشان ما أثرش على الصورة العامة للمستشفى



رجعت البيت و عكس كل توقعاتي ..ماحدش من الجيران رمى عليا جردل ماية مش نضيفة و لا لقيت أهلي محضرنلي شنطة هدومي و بيقولولي إحنا إستحملناكي كتير ..كفاية علينا كده بأه



تخيلوا..مافيش أي حاجة حصلت






ما فيش أي فرق بين النهاردة و إمبارح








أنا ما أتغيرتش و الناس كمان شايفاني ما أتغيرتش






لكن بكره والا بعده هيعرفوا و ساعتها هيعملوا إيه؟..مش عارفة ..بس أنا الأكيد أكيد ..مش هاعمل حاجة..عشان أنا لغاية دلوقتي مش حاسة إن حدث جلل حصل يعني ولا حاجة





باختصار




(بعد الرغي اللي فوق ده كله يعني)









أنا









النهاردة









بـــــــأه











عنــــــــدي







----30---







ســـــــــــــــنــــــة








أنعي إليكم بمزيج من الأسى و الحزن..عامي التاسع و العشرين اللي إنتهى إمبارح .. و نفتكره طبعا بكل خير..





(كان عزيز عليا قوي و الله..إهيء إهيء)








و أخطو اليوم أول خطواتي في عالم الثلاثينيات المرعب ..أو الممتع








(أنا و نصيبي بأه)







و لأن العام الفائت ..كان عمري 29 سنة و برضه ما سلمتش من اللقب اللي انتوا عارفينه على يد أغلبية الصحفيين و المعدين و مقدمين البرامج اللي عملوا مواضيع حوالين الكتاب







فأتوقع إن السنة الجاية هتكون سنة لطشيفة جدا جدا جدا











و لأن بلوغي سن التلاتين ده من أهم أحداث عام 2008 و قبل جواز نانسي عجرم و بعد جزمة بوش على طول





فعشان كده هتلاقوا صور التلاتين الكتيرة دي في البوست..إشمعنى يعني موبينيل دول حياللا كملوا 20 سنة؟






و أوعدكم إن اللي هيبعت 30 تعليق ..هافتحله تعليقين من غير موديريشان مجانا




يااااالا




و دلوقتي قبل ما أطفي الشمع و أفرقع البلالين







خلوني أقولكم أمنياتي للعام الجديد




1- يا رب تبعد عن طريقي كل الطنطات الحشريات اللي لما هيسألوني عن سني و أقولهم 30 أكيد هيضربوا أقفاصهم الصدرية بإيديهم و يشهقوا شهقة إستحضار جني الملوخية و هم بيقولولي ..يا لهوي..و لسه خالية لحد دلوقت على أساس إني كان المفروض أبقى دلوقتي زوجة إيجار جديد





2- يا رب تبعد عن طريقي كل البنات و الشباب اللي لما بيقابلوني في أي حتة يدققوا قوي في وشي و يقولولي غريبة ..و لا باين عليكي السن..على أساس إني لازم أبقى شبه صباح أو نادية الجندي أو فتحي سرورعشان يبقى عندي 30 سنة




3- يا رب تبعد عن طريقي أي صحفي أو معد أو مقدم برامج ما قراش ولا حرف من المدونة و لا الكتاب و نام و صحي و قالهم ماتجيبولنا البنت دي بتاعة "العنوسة"


(اللهم إكفني شر الإعلاميين ..أما أعدائي فأنا كفيل بهم)





4- يا رب تهدي كل صحباتي اللي طول النهار بيتكلموا عن عيالهم (و الإسهال و الإمساك و الترجيع) ..يا رب نفسي أفطر مرة بنفس من غير ما يقلبوا معدتي..ولا يعني لازم أستحمل عشان كل واحدة فيهم عندها 3 عيال و أنا الوحيدة اللي عندها 4 بلوجات و كتاب؟




5- يا رب مافيش أي تباع ميكروباص يقوللي يا مدام..يا رب مافيش أي تباع ميكروباص يقوللي يا مدام..يا رب مافيش أي تباع ميكروباص يقوللي يا مدام




6- يا رب ما أسمعش التعليق عن أي نجاح أو أي حاجة كويسة باعملها بالقول المأثور.." طب كويس إنك لاقية حاجة تشغلك"..يا رب اللي يقولهالي يقعد يتفرج ع البيت بيتك لمدة 6 ساعات و يكون يوميها "تامر أمين " هو اللي بيقدمه ..بس خلاص..ياللا بأه ..هم اللي جابوه لنفسهم



7- يا رب البيه اللي مغلبني ده و مش راضي ييجي و لا حتى يعرفني أول حرف في إسمه و لا حتى يطلعلي في الحلم زي حسين فهمي في خللي بالك من بوزو ..يا رب يكون متشحطط زي ما نا متشحططة و متغلب زي ما أنا متغلبة ....زهقني ..زهقني..إيه الملل و اللكاعة دي ..يا رب يتكعبل دلوقتي في حرف السجادة و يتخبط في سن الحيطة و ياخد غرزتين في دماغه عشان أعرف إني بادور على واحد كان بيتخانق مع ماكنة خياطة و ما يدخلش صالون بيتنا أي عريس ما يعديش إختبار الغرز..و أخلص بأه من موضوع الصالونات ده خالص



هه..هه..هه



معلش إنفعلت شوية




عموما كل سنة و أنا طيبة ..النهاردة بأه عندي 30 سنة ..و السنة الجاية إن شاء الله ..بافكر أرجع و أبقى 29